اكبر غلطة غلطتها في حياتي

وقتها كنت مزهوله ومبرقه عينيا وانا بسمع له،، ماكنتش عارفه ارد اقول ايه،، اواسيه ولا اشتمه،، اشفق عليه ولا اتغاظ منه،،

فلقيتني بقول_طب والقـ,ـميص التومي دا جبته من حياتك الجديدة ازاي؟؟

وقتها ضحك فقلبتها هزار شويه معاه فقال لي بعد ما بطل ضحك=دا كان هدية من اختي فماقدرتش ارفضها،،

بعدها رجع للجد تاني وقال=بصي يا امل ممكن يكون صعب ان حد يصدق ان واحد معاه الفلوس دي كلها ومامدش ايده على مليم منها او اتنازل عنها لاخته لكن الحقيقة اني حاسس ان فلوس ابويا دي مش من حقي او خسارة فيا،، عارفه انتي ان القاتل في الشرع مابيورثش اللي قتـ,ـله،،

وساعتها وقف عن الكلام شويه لكن بعدها تمالك نفسه وقال=انا بقا قـ,ـتلتهم الاتنين في اسبوع واحد….

ساعتها كنت حاسه إن أنا اللي عايزه أبكي،، مريت بمود كئابه غير عادي،، فقطعت كلامه وقلت_آه طبعا من حقك تعيش،، دا ربنا غفر لواحد قـ,ـتل مية نفس،، وبعدين احنا كلنا أخطاء،، وهم بردو اخطأوا لما حاولوا انهم يقـ,ـوموا خـ,ـطأك بخطأ أكبر،، اللي زيك يا يوسف ماكانش ينفع يتجوز ويبقى مسئول عن بيت واسره الا لما يتأكدوا الاول انك بقيت كويس خاصة ان كان سنك صغير،، مش انهم يعملوا كده عشان يخلوك تبقى كويس،، وبدل ما كانت الكارثه على أد بني آدم ضايع لوحده بقت أسره

ضايعه،، اما اللي ماـ,ـتوا الله يرحمهم فدول كان قدرهم يموتوا،، احنا مجرد اسباب،، ولو انت ماكنتش موجود كان الف سبب غيرك ممكن يموتوا عشانوا،، بص يا يوسف انسى بقا انك حكيت لي اصلا،، وانسى حوار الخطوبه دا كمان،، انا اصلا كده كده رافضة المبدأ دلوقتي،، بس خلينا من هنا ورايح اصحاب بجد ،، وعلى فكرة حلوه فكرة انك تبني نفسك لوحدك دي،، حلوه جدا كمان وعاجباني دماغك فيها جدا،، لكن لازم تتجاوز عشان تعرف تعيش،، واكيد باباك حاسس بيك دلوقتي واتطمن عليك انك بقيت كويس،، اللي تقدر تعمله بجد انك تزور قبره وتدعيله وهيوصله دعاك وهيعرف انك اتغيرت وان كل اللي عمله ماراحش هدر..

ونهينا مكالمتنا على كده وليلتها مانمتش طول الليل،، كان جوايا احساسين،، الاول اني اهـ,ـرب واسيب الشغل وابعد عن يوسف دا خالص لاني كنت خايفه اني اقرب منه مع حالة التعاطف اللي جوايا ناحيته ،، والتاني اني لازم اساعده واقف جنبه عشان يكمل في طريقه،، لكن بمرور ايام بسيطة كان كل تواصلنا فيها في الشغل وعلى النت وفي الفون اكتشفت انه فعلا بني آدم معدنه طيب وابن ناس ومجتهد فعلا،، وبيحاول انه يطور من نفسه ويدرس عالنت،، وانه يمكن التجربه اللي مر بيها

وخرج منها خلته انسان افضل واقوى كمان من اللي مامرش بتجربه ومن اللي فضل محـ,ـبوس فيها،،، وبعدها بدأت اشجعه انه يكون اجتماعي اكتر ويحضر الايفنتات اللي بيعملها زمايلنا في الشغل لما كان التيم بتاعنا بيتجمع مره او مرتين في الشهر بره الشغل،، وفعلا بدأ ييجي وبدأت لمحة الحزن اللي ملازماه تروح،، وواحده واحده بدأت علاـ,ـقتنا تزيد وبدأنا نخرج سوى،، الحقيقة ماكنتش متخيله اني هلاقي حد يعاملني بالطريقة دي،، فاهمني جدا ،، ودمه خفيف اوي وبيعرف يضحكني،، ومش شكاك ولا موـ,ـسوس،، وعنده حاجه كده بيسـ,ـموها سـ,ـمو روح او سـ,ـمو عن الصغائر ،، وعنده خبره في الحياة،،

وفي الوقت دا وبعد شهور من اول مكالمه حصلت بينا كنت بدأت أسأل نفسي هو انا بدأت احبـ,ـه فعلا ولا دا تعاطف معاه،، خاصة انه تقريبا كان ناسي خالص انه في يوم من الايام كان متقدملي،، يعني مابيجيبش سيرة حب او علـ,ـاقة وبيتعامل معايا زي اخته،، اللي كان عرفني عليها بعد مازادت علاـ,ـقتنا وكان واضح من الكام شات اللي عملتهم معاها انها اطيب منه كمان،، وبتخاف عليه جدا وسعيده جدا بالحاله اللي بقا عليها،،

لكن صاحبنا دا كان عامل من المريخ،، وفي الوقت دا اللي بقيت فيه كل شويه أسأل نفسي هو مابيقوليش بحبك ليه،، هو مابيجيبش سيرة انه كان عايز يخطبني ليه،، اتأكدت ان انا اللي حبيته لدرجة اني بدأت اتنرفز منه ومن سكوته،،لغاية ما في يوم كنا بنلف في مول سوى وبنتمشى جنب بعض عادي بين المحلات لقيته بيقولي من غير اي مقدمات على فكره انا بحبك….

…………………………………………………………….

وقتها كنت مبسوطه جدا لكن اكتفيت بابتسامه وكملنا اليوم واول ما روحت اتصلت بيه وقلت له انا كمان بحبك ومن بعدها زي مايكون حد كان بيجري ورانا اتخطبنا مافيش بعد اسبوع واحد ويوم خطوبتنا اللي حضر فيه اخته وجوزها،، اخته بلغته انها حولت له فلوسه كامله على حسابه ،، وبعدها مافيش شهرين كنا اتجوزنا وبنقضي الهوني مون في تركيا وبعد كده رجعنا على شقه اشتراها في المعادي،، وغير عربيته،،وسبنا الشغل وفتحنا شركة كتبها بأسمي،، لكن بعد فترة بسيطة بدأت

أحس إن إحساسه ناحيتي مش احساس حب بيور،، لكن إحساس تقدر تقول عليه تبجيل او عرفان بالجميل،، حاجه كده زي ما يكون حـ,ـاسس اني حد بيعطف عليه مش بيحبه وهو بيقابل العطف دا بامتنان،،خاصة اني كنت الوحيدة في حياته الجديدة دي اللي عارفة بماضية والمشكله الأكبر اني على قد ما كنت بحبه اني فعلا فعلا كنت متعاطفه معاه ومع حكايته لكن مش عطف اللي هو شفقة لا كان تقدير ليه ولكونه فعلا قدر يتجاوز،، لكن احساسه دا مع الوقت زي ما يكون بدأ يخنـ,ـقه بعد ما بقينا في كيان واحد وبيت واحد وحاجه واحده،، وبدأت تظهر امثله كتير على كده ابسطها انه كان احيانا ممكن يمسك كوباية او

برطمان تروح واقعه منه تتكسر،، ودا كان نتيجة انه كان عنده رعشه خفيفه كده في ايديه من الآثار اللي كانت بقيت من رحلة ادمانه،،فكنت مابغضبش نهائي بل بالعكس كنت اقوله معلش يا حبيبي وابـ,ـوسه واقوله اخدت الشر وراحت فكان في الاول يبتسم عادي لكن لما اتكرر الموقف اكتر من مره وكان دايما رد فعلي زي ماهو،، بدأ هو يكون رد فعله على كوني مابغضبش او اتدايق انه يبصلي بملامح باردة لغاية ما في يوم راح قايلي_ ما خلاص بقا يا أمل،، ماتعيشي معايا طبيعي وتنسي اللي فات،، هو انتي لغاية امتى هتفضلي محسـ,ـساني انك بتشفقي عليا وراح سايب البيت وخارج…